مرت راعي الغنم

(1)

زوجي مفتون بالسوريات!!!!!!!!!!
زوجي هوايته إقتناء الاغنام السوريه ،،، يبيع ويشتري ويربي يحلب ويظلف يعلفهن ويرضعهن واحيانا تصير عنده ولاده متعسره فيضطر لمساعدتها ماخذاتن كل وقته مرتن من المرات طقت سبدي من القعده لحالي البنات اما عند
دروسهن او يخرطن مع صديقاتهن ،، والعيال لامني درستهم راحو مع ابوهم للغنم وانا بين اربع جدران قلت: يابو فلان تراي ابروح معك للغنم قال: وشوله ؟ قلت: بس ابروح . قال :لا انا عندي شغل ولانب قاعدن معس خليها بكره لودينا العيال للمدارس نروح انا وياس انتقهوا ونفطر هناك . قلت :ما يخالف .
والله واروح لبنياتي واول مااقبلت على الغرفه ولا ذيك الصجه وافتح الباب قلت :يا بنات وش رايكم اسوي شاهي ونقعد نسولف شوي ولا نشوف برنامج في المجد بس مهوب حيوانات قالوا :ايه يمه والله مشتهين شويهي من ايدينس الحلوه .
قلت: صار.
واروح واسوي شاهي واجيب معه فصفص ،،
قلت :يالله يابنات جا الشاهي ونقعد بغرفتي علشان انا نقلت التلفزيون يوم البرنامج اللي يخوف الجانب المظلم وبعد ماشفته راحت علي نومه ،،،
المهم قعدنا ندور برنامج مناسب حطته بنتي على الوثائقيه ولافيها قرود يتحككون


وقعدو يتضاحكون قلت :غيريه قالت :لا يمه نبي نشوفه قلت :غيريه حومتي سبدي ::: قالت: مافيه شي قلت: كل هالعلوم الزينه ولافيه شي،، قالت :خلي نصكه ونسولف ازين قلت: ازين نبي نشوف وش عندكم من علوم والله ويبدن وحدتن تقول >>حنا نبي نصبغ الفصل ونبي نحط جدار وردي وجدار ازرق ايه يمه ابي فلوس ابي اروح اجيب زينات للفصل عندنا مسابقه للاحسن فصل قلت : ان شاء الله لمنه جاء ابوك يوديس واشري اللي تبين قالت: الثانيه شفتي يمه فلانه بنت فلان صابغه شعرها يمه يجنن لونه قلت : انشاء الله لعرستي سوي اللي تبين قالت :لا يمه الحين علشان اصير زينه ، واعرس قلت : اقول انزلعن برا وخوذو الشاهي معكن وخلوني اشوف حفظي ابرك لي
وراحن لغرفتهن يكملن خرطهن وانا جلست احفظ المقرر اللي علي بكره تسميع
>>>>>>> جاء الصباح <<<< وقمت وانا نشيطه ابروح مع رجلي للغنم قومت عيالي وبناتي وصلو عيالي الصلاة في المسجد ولله الحمد والمنه ويوم جو ولاني مسويتن الفطور قعدو يفطرون
وانا رحت اجهز لهم ملابسهم وانقل جداولهم يوم اني قظيت
قلت: ورا ما اروح اسوي قهوه ازين من تسواتها في ذاك


والله واشيل غريضاتي واركب يوم وصلنا العيال والبنات >>>

ونحول على الحوش قال ابونا: حيا الله ام افلان قلت :الله يحييك ويبقيك لعين ترجيك،،
مير هذولا عيون وشكثرهن ماشاء الله يوم سمعو حسنا اشرابت الاعناق وجحظت الاعين وبدن (( ماء ماء ))وش ها الرومنسيه والله واجر ذيك الطاوله والكرسي واحط قهيوتي وتميراتي بس هالذبان خلونا نتقهوى ؟؟
والا ناكل تمر اعوذبالله كل ماجيت ارفع فنجالي لقيت فيه ذباب (وانتم بكرامه(
المهم سويت نفسي اتقهوى انا اللي باغيتن الجيه استاهل ،

الرجال شربله فنجالين >> وقال : عن اذنس ياام فلان قلت : وين ؟ قال : ابدخل عندهن شوي

قلت: هالحين انا عندك وتبي تروح وتخليني !!!! قال: لا بس ابشيك عليهن قلت :بس لا تتاخر .قال: بس خمس دقائق. قلت: يالله(( المهم اني معه )).
الخمس صارت عشر >> والعشر صارت ربع والربع صارت نص
>> تقولون وش يسوي ؟؟؟ يرضع ويحلب ويداوي !!!! يوم اني مليت واقوم وادخل الخيمه ،، واناظر ولا الدعوه يبي لها كرف!!!!!!
وافسر عن ذرعاني والله وانظفها واجمع المويعينات واغسلهن .


>>>يوم اني خلصت وادور الرجال ولاه حاطن الحليب في الخضاضه يبي يطلع زبده قلت: اقول قم ودن للبيت !!!! قال :لا ما يصير خليس انت موسعتن صدري ،،، قلت : ماشاء الله الحين خيمتك نظيفه ، وملحقاتها ، ومواعينك ،،،
صدرك الحين وش وسعه قم ودن علشان راسي بدا يوجعن من الريحه ريحة هالغنم!!!
00 قال ::خمس دقائق وابشري قلت :الحين الزبده كم يبيلها وتطلع من هالحليب ؟؟؟؟ قال من نصف ساعه وفوق ... قلت : ياويل قلبي ويلاه توبه ماعاد اطب هالغنم لو وش يصير

ياربي >>راسي غنم ماتلم اثاميها ، وديك كل شوي يذن ،وحمام يون ونين تقل مرتن تضني ،وبط مشفح مغير يتلاحقن ويكاكن كنهن يلعبن غميمه ،،،،
قلت :ابو فلان !! الغداء ؟؟؟ قال :ماعليس نجيب من برا ،،العييل يحبون المضغوط . قلت : ابوفلان الشغاله لحالها وهااليام ميحتاج موضة هروب الشغلات والسطو على المنازل ؟؟؟؟؟

قال :هه يله اركبي !!!!!!!!!!


منقول

مرت راعي الغنم

فاصل ونواصل

مرت راعي الغنم

تابعوا حلقاتي الشيقة والممتعة

سرنديب

__________________

االوافي

حلووووووووووووووه

__________________
.
.
.
.
.
.
التوقيــــــــــــــــــــــــــــــــــــــــــــ ـــــــــــــــــــــــــــــــــع
((كلمتان خفيفتان على اللسان ثقيلتان في الميزان))

سبــحـــــــــــــــان الله وبحمده

سبحـــــــــــــــــان الله العظيم

مرت راعي الغنم

تسلمون على المرور

مرت راعي الغنم

(2)


تعودت مرت راعي غنم ترسل عيالها مع ابوهم للاستكشاف
واليوم اللي يعيي لياخذهم فيه اقول: وش عنده؟؟!! اكيد انه معرس
وتبدا الكوابيس والحلوم :
وافتح المفكره على ارقام الشيوخ اللي يفسرون الاحلام واقعد لي مده على هالحال الين>>
قال: لي واحدن من المشايخ( ترى ان كلمتي مرتن ثانيه والله لاصك بالجوال الجدار)خخخخخخخ
>>وكلما قال ابليس ابوكم وينه ؟؟؟؟؟
خذت الجوال واتصلت والله اني اتعذر باي شي علشان اسمع الديك والا عنز
> المهم اعرف انه هناك واتاكد .

>المهم مع الوقت تاكد لي ان الرجال مسيكين يحب غنيماته وبلشن بهن وكان اذا خلص من شغله عند غنمه راح يتعلل عند اخوياه الي بالغنم وما فاتني اني اتاكد اكلم واسمع الصجه واللجه
في يوم من الايام كان عنده حراج للغنم يعني( سوق يجلبون فيه حقين الغنم غنمهم ويبيعون ويشترون) وكان ابونا هو وربعه لمنهم خلصوا يروحون للمكان اللي يجتمعون فيه ويتعشون ويكملون السهره.
وكان يوم مدارس وكنت قاعدتن لحالي عيالي ناموا وانا قفلت البيبان وصكيت الباب حق قسم النوم بس ما قفلته وكان عليه المفتاح ذيك الليله يابنات ماجاني نوم وزهقانه قلت خليني اكلم احد اسولف شوي واوسع صدري لين يجيني النوم والله واكلم اخيتي وافضفض لها مكنونات صدري..
>>>>>>> وفجاة وانا اكلم شفت سلك التلفون( يتحرك) قلت: اخيتي ترا فيه احد برا فيه حرامي!!
وعلشان تفهمون الوضع ترا السلك جاي من الصاله الخارجيه الى الداخليه وبينهم باب وانا اشوف السلك يتحرك من تحت الباب قلت ترا هذا بيقطع السلك ولا امداني اخلص كلمتي الاوالسلك(-مقــــــــــــــــــــــطوع)

والله يا بنات اني قعدت( اررررررجف) وربي الهمني ورحت اركض وقفلت الباب الداخلي

> واصير ادور مثل المهبوله وش اسوي اروح للجوال اكلم ابونا البيت مافيه ارسال فيه عازل.

ياربي اطلع راسي مع الدريشه واصيح للجيران والله واطلع راسي ويدي مع الدريشه واتصل على ابونا واقول:احمد طب علينا حرامي الحقنا بسرعه!!!

قال: هــــــــــــــــه وش تقولين؟؟ قلت :الحقنا الحقنا .
قال: ما اسمع! كلمي من تلفون البيت.
>> طبعا الكلام مقطع ويسكر الخط ياربي بالموت قدر يشبك التلفون واجلس اصيح

وادور واحط اذني على الباب واتسمع واسمع قرقشه واروح لبنتي الكبيره>>>>>>> قلت: يابنيتي قومي انا زهقانه!! (( وما قلت لها حرامي علشان بنيتي ما تنهبل)) قالت: يمه بكره مدرسه ابي اشبع نوم!!
قلت: معليش يابنيتي غيبي بكره.
>> فتحت عين وحده وقالت: قدها؟؟
قلت: وقدودها!!
قامت على حيلها وقالت: وشفيس يمه؟؟ ما جاء ابوي؟؟
قلت: لا قالت وشفيس يمه؟
قلت: وش فيني؟؟! قالت: وراس تحقرصين قلت: فيه حرامي برا!!
قالت: وشو؟؟؟؟؟؟ وانا احط يدي على خشتها

واجرها لغرفتي قلت: وش السوات؟؟ قالت يمه ارسلي رساله !! قلت : ونعم ببنيتي واقوم وارسل(((((( يوجد حرامي بالبيت الحقنا )))

ولا امداني واسمع الباب الخارجي> ينفتح< ولاه ابونا يقول: يافلانه فلانه؟!؟!

>> واقوم اركض وافتح الباب واقول: احمد احمد(( مثل الافلام))

قال: وش السالفه؟
قلت: السالفه السلك مقطوع ماتشوف!!
قال: ايه والله قلت هذا حرامي يبي يعزلنا عن العالم ويقوم بشغله !!
مااقعد في هالبيت يالله يابنت قومي اخوانس نبي نروح لامي...
قال: الخبيث الخبيث.
قلت: منهو؟؟ منهو؟؟
قال : الفار!!

الوافيه

ههههههه

الحرامي طلع (فار)

الله ياخذ العدو ..
..

مرت راعي الغنم ..
تكفين كملي القصه ..

تحمست كثير ..

االوافي

ههههههههههههههههههههه انا لله

__________________
.
.
.
.
.
.
التوقيــــــــــــــــــــــــــــــــــــــــــــ ـــــــــــــــــــــــــــــــــع
((كلمتان خفيفتان على اللسان ثقيلتان في الميزان))

سبــحـــــــــــــــان الله وبحمده

سبحـــــــــــــــــان الله العظيم

زرقاء اليمامة

المذكرات روعة قريتها في احدى المنتديات
اقروها لا تفونها رهييييبة
يسلمووو مرت راعي الغنم ع النقل الاكثر من رائع

__________________