من لاينـال الطيـب بـاول شبابـه=ماظن يظفر به اليا عارضه شـاب
ومن لايميز فـي خطـاه وصوابـه=لوصاب مره عشر مرات ماصـاب
ومن لاعلى جسمـه يفصـل ثيابـه=والله ليعلج فوق ضرس وتحت ناب
ومن لايعرف القيـظ يتبـع سرابـه=ويصبر على لفح السمايم والاتعـاب
ومن طق بيبان العرب طـق بابـه=ولاضاع حق وقافي الحـق طـلاب
والسيف قـوة سلتـه مـن نصابـه=ولاخير في سيفٍ يجرب في الاقراب
ياللي تبـي قـدرٍ رفيـع ومهابـه=ابعد عن الشباك وادخل مع البـاب
وحاذور من جحر الخبـاره ودابـه=ترى الوقايه خير من كل الاطبـاب
ولاتعتـرض لـك عيـةٍ تبتـلابـه=دامك معافـى لاتعـرض للانشـاب
ولاتـارد الا اللـي عـذيٍ شرابـه=عد الوبا مايشربه كود مـن خـاب
والجار لو عن داره ابطـا غيابـه=خلك وصيه لاتخونـه اليـا غـاب
والضيف رحب بـه وكـرم جنابـه=وقدم له الميسور من كـل ماطـاب
وتبشر بقول ونعم فـي كـل جابـه=ويزداد قدرك بين ربعك والاجنـاب