][سالفة نوره ][

ينابيع · 12-Aug-2010

اتمنى انها تعجبكم مثل ما اعجبتني

إلا نورة ..

بنت غاية في الجمال ..

حسنها ياخذك من يمناك ..

لحدود الخيال

يوم نادت أمّها وبصوت عالي :

( يمّة .. يمّة بسرعة تعالي ) ..

لمّا جتها أمّها ..

قالت : علامك ؟

نورة قالت :

يمّة أرجوك بقيامك ..

إبعدي هذي المراية..

ابعديها ..

وإلا أقلّك ..

يمّة تكفين اكسريها ..

ما أبيها .. ما أبيها ..

ولو سألتوا ..

ليه هي قالت كذا .. وإيش العلاقة ؟

قلت شوفوا ..

ماقدر أخبّي لذا .. نورة ( معاقة ) !

*******

شلل نصفي ..

سرق منها طفولتها ..

سرق حتى ابتسامتها ..

تشرّب جسمها الطاهر على غفلة

ولا قدّر برائتها وهي طفلة

حواليها كثير أطفال ..

بنات العم .. والجيران ..

عيال الخال ..

تراقبهم .. تتابعهم

تشوف ( أحمد ) وهو يسحب شعر ( سلمى )

و( علي ) يلحق ( مها ) وبيده مسدس ما

و( خالد ) قاعد يحاور ( حسام ) ..

بعلبة البيبسي

ويكسر ظهر هالمشهد ..

حزن ( نورة ) وهي تبكي على الكرسي

تحاول قد ماتقدر ..

لجل تخفي مدامعها

وثار الدمع واتحدر ..

وبدت رعشة باصابعها

تزم إيدينها لكن ..

يديها ماتطاوعها

****

وتكبر نورة ويكبر ..

معاها الهم

ويجري حزنها الأقشر ..

بمجرى الدم

وياصل عمرها العشرين ..

وفي هالعشرين ..

تغيّر كل شي فيها ..

ملامحها .. - مع إن الحزن ماسحها -

أمانيها .. - ولو ماعاد تعنيها -

سوالفها .. - بعد مالهم والفها -

في هالعشرين ..

على نفس الألم تصبح ..

وعلى نفس القهر تمسي ..

على الكرسي .. !!

في هالعشرين ..

أبد ماتابعت موضة ..

ولاتعرف ( جيفينشي ) .. أو ( كريستيان ديور )

أو ( فيرساتشي ) وعروضة

ولا مكياج وإكسسوار ..

وحتى عطور ..

تضج .. تثور

إذا قالوا لها ..

( نورة .. شرينا لك عطر ..

شوفي بعد فستان ..

يانورة إلبسيه ألحين ..

ترا بيطلع عليك جنان ..

بسرعة بس لاتبطين )

تجاوبهم :

(بسرعة ! ..

بسرعة ليه ؟

وإلا لمين ؟

وهو من كثرة العرسان ! )

تقاطعها أمها :

( نورة ..

وش تقولين !! )

ترد نورة :

(( يبه .. يمّه ..

كفاية وإسمعوني زين ..

أنا عمري ترا عشرين

ترا ما عادني طفلة ..

ياناس المسألة سهلة ..

مثل ما (1) و(1) يساوي (2)

معاقة .. خير ! ماتفرق .. ))

- وفي هاللحظة ..

بدت لحية أبونورة ..

تلم الدمع من عينه ..

وبدت تغرق !-

يبه .. يمّه
أنا مليت من روحي ..

نعم مليت

تعبت أداري جروحي ..

وياما أخطيت

خطاي إني تصنّعت السعادة ..

لجل خاطركم

لجل ماتـنجرح فيكم ..

مدامعكم

يبه تدري ؟ ..

كنت أتمنى من صغري ..

وهذي أمنية عمري ..

وإلا ألحين هي منوه

تمنيت أحضنك بالليل ..

إلا من جيت من شغلك

أبوسك فوق راسك حيل ..

وأفك الجزمة عن رجلك

أروح أجيبلك قهوه ..

وأجيك أجري

وحتى إنتي يا أمّي ..

لو تدرين كم عانيت ..

كم أتمنيت ..

أخفف عنك شغل البيت

مثل ما ( نجوى) ..

تساعد مرت عمّي

يبه .. يمّه

تراني ضقت

وربي ضقت من نفسي

ياربي شقد طفشانة ..

وتبغوني بعد ألبس !!

ألبس من علشانة ؟

أبد لاتصدقون إني ..

أبتزوّج وأجيب عيال
والله عال !!!

من إللي في الزمن هذا ..

بيرضى أكون له زوجة ؟؟

ويتزوّج معي كرسي !!

يبه إنسى ..

وحتى إنتي دخيل الله يايمّه ..

بعد إنسي ))

وهذي سالفة نورة ..

ياهي بنت مقهورة ..

مضى من عمرها عشرين ..

وهي باقي على هالحال

حكايتها إنتهت ألحين ..

وخلّت داخلي ثورة ..

وأنا ما بيهدالي بال ..

إلين أعرف ..

من إللي بوقـتـنا رجّال ..

ويتزوّج مثل نورة ؟؟

ما اظن واحد يتزوج مثل نورهـ

في هالزمن كلن وحياته ما يهتم لحياة الغير ..

ديني كياني · 13-Aug-2010

قصه مؤيثره ..

أثرت فيني وآلمتني ..

اللهم لك الحمد على نعمك اللهم لك الحمد كما ينبغي لجلال وجهك وعظيم سلطانك ..

الله يعطيك العافيه غلاتي ||~

ينابيع · 13-Aug-2010

الله يعافيك يالغلا
نورت والله
مرزرك شرفني

قناص الشمال · 14-Aug-2010

ختي ينابيع اخترتي فأبدعتي بقصيده آلمت كل ضمير حي وابكت كل احاسيس الوجود سلمتي لنا وللمنتدى

ينابيع · 14-Aug-2010

وسلمت انت اخي
مرورك شرف لي
شكرا لك

أمة الله · 14-Aug-2010

الحمد لله الذي عافانا مما ابتلى به غيرنا وفضلنا على كثير ممن خلق تفضيلا .

اللهم لك الحمد حتى ترضى ولك الحمد إذا رضيت ولك الحمد بعد الرضا .

انا أعرف شخصين متزوجين معاقات وعايشين بسعاده إحداهما أنجبت والأخرى لم تنجب بعد .

أبدعت أختي بااختيارك .فشكرا لك أسعدك الله .

ينابيع · 14-Aug-2010

الابداع مرورك
مشكووورة يالغلا

تميميه506 · 17-Aug-2010

مآرآ مؤلمممة

آلله يكون في عونهآ وعون كل معآق ومعآقة ..

يعطيك ربي مليون عآآفيه

دمتي بحفظ آلوآحد آلأحد ..